GEO ENG
GEO ENG

სტატიები

უბნის წარმატებული დაწესებულების ისტორია

მცირე ზომის ლოკალური დაწესებულებების მთავარი საზრუნავი მუდმივად არის, გამოირჩეოდნენ მეზობელი კონკურენტებისაგან და მოიზიდონ იქვე მცხოვრები მოსახლეობა. როგორ შეიძლება ამის მიღწევა, რაზე უნდა დაიხარჯოს ძალისხმევა? სტატიაში მოგიყვებით წარმატებული საცხობის მაგალითს, რითაც შევეცდებით გადმოვცეთ, რაზე უნდა ხდებოდეს მობილიზაცია და რა ამოცანები უნდა გადაიჭრას დასახული მიზნის მისაღწევად.

 

ეს საცხობი არც ისე დიდი ხანია, რაც ფუნქციონირებს. შესვლისთანავე იგრძნობა მისი განსაკუთრებულობა, ძალიან სუფთა და მოწესრიგებული გარემო, გაღიმებული გამყიდველი და უამრავი მყიდველი. ირგვლივ უამრავი საცხობია, მაგრამ არსად არ არის ამდენი კლიენტი: დედები და ბებიები ბავშვებით, ახალგაზრდები. როგორ შეძლეს ეს? სწორ ამოცანებზე კონცენტრირებით და მომხმარებლებზე ორიენტირებულობით:

 

1. მომხმარებელთა მოთხოვნების მუდმივი შესწავლა და გათვალისწინება – ჯერ კიდევ გახსნამდე 2 კვირით ადრე, სანამ სარემონტო სამუშაოები მიმდინარეობდა, მეპატრონემ რამდენიმე სახლში მაცხოვრებლებს ჩამოუარა, აცნობა, რომ მალე საცხობი გაიხსნებოდა და პირველი კვირის მანძილზე ნახევარ ფასად გაიყიდებოდა ყველაფერი.

 

აქვე გამოკითხვაც ჩაატარა: რას შეიძენდნენ ყველაზე ხშირად, რა მოთხოვნები ჰქონდათ პროდუქტის, მომსახურების მიმართ, რა შემთხვევაში გახდებოდნენ კლიენტები.

 

ეს დაეხმარა ასორტიმენტის განსაზღვრაში, რაც მთავარია, მოქმედება არ იყო ერთჯერადი. შემდგომშიც მუდმივად ცდილობდნენ კლიენტების აზრის გაგებას გამყიდველებიც, რა მოსწონდათ და რა არ მოსწონდათ და მაქსიმალურად ითვალისწინებდნენ, თუ რაიმე გამოსასწორებელი იყო, იწყებდნენ მის შეცვლაზე ზრუნვას.

 

2. ხარისხიანი პროდუქტი, ნებისმიერ დროს! – დიახ, მათ ჰქონდათ მუდმივად კარგი ხარისხის პროდუქტი, მუდმივად ახალი და გემრიელი. ეს არც ისე მარტივი მისაღწევი იყო: ჯერ სტანდარტები შექმნეს, რა როგორ უნდა გაკეთებულიყო, როგორი ინგრედიენტებით, რა რაოდენობებითა და თანაფარდობებით.

 

საკმაოდ ბევრი იწვალეს კარგი მომწოდებლის მოძიებაზე, რომელიც მუდმივად ახალ და ხარისხიან ნედლეულს მოაწვდიდათ. ნედლეულის ხარისხს ძალიან დიდ ყურადღებას აქცევდნენ და თუ რაიმე არ იყო დამაკმაყოფილებელი, უარს ამბობდნენ შეძენაზე მიუხედავად კარგი პირობებისა.

 

შედეგად ააწყვეს ურთიერთობა რამდენიმე სანდო მომწოდებელთან, რომელიც უწყვეტად ამარაგებდა საცხობს.

 

საინტერესოა ისიც, რომ ასორტიმენტი არც ისე მრავალფეროვანი აქვთ. ამით ის შეძლეს, რომ სპეციალიზაცია მოახდინეს კონკრეტულ მიმართულებებზე, დახვეწეს და მიაღწიეს კარგ ხარისხს.

 

3. ახლო ურთიერთობის განვითარება მომხმარებლებთან – საცხობის თანამშრომლები ძალიან ყურადღებიანები აღმოჩნდნენ მომხმარებლების მიმართ, მუდმივად ეკითხებოდნენ თავიანთ ამბებს, მოიკითხავდნენ ოჯახის წევრებს, გაიცნეს თითქმის მთელი სამეზობლო და დაუახლოვდნენ კლიენტებს. ამით მომხმარებლები უფრო ლოიალურები გახდნენ, ნდობაც გაიზარდა, მათთვის ძალიან სასიამოვნო იყო ურთიერთობა გამყიდველთან და მცხობელებთან.

 

4. მუდმივი ზრუნვა მომხმარებელთათვის კომფორტის შესაქმნელად – ისინი მოწადინებულები იყვნენ, კლიენტების კმაყოფილება გაეზარდათ, რაზეც მუდმივად ფიქრობდნენ და რაც მარტივ, მაგრამ სასიამოვნო ფაქტებში გამოიხატებოდა.

 

მაგალითად, ცხელ ზაფხულში სიამოვნებით მოგაწვდიან ცივ წყალს უფასოდ, ზამთარში გაცივებულ კლიენტებს ჩაის დალევასაც სთავაზობდნენ. პატარებს კანფეტებს ჩუქნიან, სიამოვნებით უზიარებენ მყიდველებს რეცეპტებს, თავიანთი მომწოდებლების კოორდინატებიც ბევრს მისცეს, საიდანაც მოსახლეობა შედარებით იაფად ყიდულობს პროდუქციას. რამდენჯერმე წამახალისებელი მარტივი გათამაშებებიც გააკეთეს. ნაცნობ კლიენტებს, რომლებიც ახლოს ცხოვრობდნენ, შეეძლოთ დაერეკათ და შეკვეთა გაეკეთებინათ და მიჰქონდათ ადგილზე.

 

ეს ყველაფერი ძალიან მარტივი გასაკეთებელია, მაგრამ თითოეულში იგრძნობა მზრუნველობა მყიდველზე, რის მიმართაც შეუძლებელია გულგრილი გახდე.

 

მიუხედავად იმისა, რომ ეს მაგალითი არ არის რეალურ დაწესებულებაზე, მათგან ძალიან ბევრი რამ შეიძლება ისწავლოს ნებისმიერმა მცირე ზომის დაწესებულებამ: იქნება ეს უბნის მაღაზია თუ მცირე ზომის აფთიაქი, კომპიუტერული სერვისები, სალონი თუ სხვა რამ. მიმდინარე საქმიანობაში ბევრს ავიწყდება და ყურადღების მიღმა რჩება წარმატებისათვის აუცილებელი ფაქტორები:

 

1. მომხმარებლებს მიაწოდოთ ის, რაც სურთ – ამისათვის კი აუცილებელია, მუდმივად იცოდეთ, რაზე აქვთ მოთხოვნა: ჩაინიშნოთ, რას კითხულობენ (მაგ. მაღაზიაში მომხმარებლები რას ითხოვენ), გამოკითხოთ მუდმივად, კონკურენტებსაც დააკვირდეთ  რას ყიდიან კარგად, რა ასორტიმენტი ან მომსახურებები აქვთ.

 

2. ხარისხიანი პროდუქტი თუ მომსახურება – სტაბილურად, უწყვეტად უნდა გქონდეთ კარგი ხარისხი და მუდმივად ზრუნავდეთ მის გაუმჯობესებაზე. კლიენტი დარწმუნებული უნდა იყოს, რომ თქვენთან აუცილებლად ხარისხიან პროდუქტს შეიძენს.

 

ხოლო იმ შემთხვევაში, თუ მოხდა გარკვეული ხარვეზი, აუცილებლად რეაგირება უნდა მოახდინოთ მყიდველის სასარგებლოდ: ზარალი აუნაზღაუროთ, თუ გაფუჭებული აღმოჩნდა პროდუქტი, დამატებითი სერვისი შესთავაზოთ, თუ მიღებული არ მოეწონა და ა.შ..

 

რა თქმა უნდა, ხარისხიანი პროდუქტის მიღწევა არც ისე მარტივია, მნიშვნელოვანია გრძელვადიანი პარტნიორების მოძიება და მათთან კარგი ურთიერთობის განვითარება, თუ თანამშრომელი გყავთ დაქირავებული, მათი ცოდნის გაუმჯობესება (მაგალითად სტილისტის).

 

ასევე მუდმივად უნდა ხდებოდეს დაკვირვება და კონტროლი, რამდენად შეესაბამება ხარისხი სტანდარტებს, რაიმეთი კლიენტები უკმაყოფილო ხომ არ არიან, რათა დროული რეაგირება მოახდინონ.

 

3. გრძელვადიანი ურთიერთობის შენება – მუდმივად უნდა ფიქრობდეთ იმაზე, როგორ გახადოთ მათთვის თქვენთან ურთიერთობა უფრო სასიამოვნო, ღირებული და კომფორტული. გაიცანით ახლოს თქვენი კლიენტები, მოიკითხეთ, ესაუბრეთ მომსახურების გაწევისას. კარგი იქნება მათთან მუდმივად უკუკავშირი, რა მოსწონთ, რა არ მოსწონთ და მათი მუდმივად გათვალისწინება. მათთან ურთიერთობით უამრავი იდეა შეიძლება გაგიჩნდეთ დამატებით სერვისებზე ან პროდუქტებზე.

 

ასევე, შეგიძლიათ გამოყოთ კვირაში ერთი დღე, როდესაც თანამშრომლები ერთობლივად იფიქრებთ მომხმარებლების გახარების მარტივ იდეებზე, აქციებზე, საჩუქრებზე, ახალ სერვისებზე.